الاسكندرية سنة 2009

جئت لك وأنا كلي حنين أخدك في حضني زي زمان ؛ لقيتهم بيقولوا ليٌ ألأول تدفع علشان تقرب منه ولما قربت منك قالوا لي إدفع علشان تتكلم معاه ولما حبيت أقول لك علي اللي في قلبي قالوا لي ماعدش عنده وقت يسمع هو بقي من "الطرب" -قصدي أبواق السيارات المسرعة رايحة وجاية - بقي أطرش. مين عمل فيك كده يابحري ؟... مين باعك حتت حتت للصعايده يابحر ... هو في كده رأسمالية ياخلق؟ دا حتي الرأسمالية اللي إحنا عايشيين فيهاهنا وفي أماكن تانية عشنا فيها مافيش فيعا تعدي علي حقوق الفقير فيها... مين زعلك مني يابحر إسكندرية؟ ومين علمك السكوت علي الظلم؟ ده حتي إنت اللي علمتنا الغضب. فاكر يابحر لما كنا نيجيئ لك في الشتاء ونرمي فيك اللي مُثقل قلوبنا ونرتاح.. مين نساك يابحر تنسي ناسك وأهلك؟ زعلتني يابحر قوي وخلتني أمشي زعلان عليك مُش زعلان منك ... خليتني أمشي زعلان علي الاسكندرانية اللي علشان يقربوا منك لازم ألأول يدفعوا ... شئ للدخول .... حتي دخولك ...دخول الرمل بتاعتك ...بقي بفلوس؟؟؟ وشئ للكرسي وشئ للترابيزة وشئ للشمسية ...ولازم تدفع ...ولو مُش عاجبك يا إسكندراني ...إمشي روح مع الفقراء وإجلس في مكان ضيق ... إن شاء الله تقعد عل حجر اللي بقي فقير زيك وتبقي تاكل من أكله وبالمرة تشرب من كيعانك مُش من قزازة المياه بتاعته ... معلهش يابحر ...كل شئ في الدنيا بيتغير ... والعالم كلة عايش أزمة حقيقية..... لكن اللي أشتروك ودفعوا فيك مالهمش دعوة بالناس التانية اللي عايزة تشوفك ومافيش معاها فلوس .... ولي لك كلام تاني معاك يابحر... بس لما أفوق من صدمتك وصدمة بلدي الحلوة اللي عشتها لمدة أسبوعين...